ውርሻ ጸሃይቱ በራኺ

ጸሃይቱ በራኺ፡ ሓንቲ ካብ ጐብለላት ዘመናዊ ሙዚቃን ዓበይቲ ባህላዊ ሓርበኛታትን ኤርትራ፣ ኣብ ስደት፡ ኣብ ሮተርዳም፡ ሆላንድ፡ ኣብ መዓልቲ ናጽነት ሃገረ ኤርትራ፡ 24 ግንቦት 2018፡ ኣብ 79 ዕድሜኣ ዓሪፋ። ስነ-ስርዓት ቀብራ ሎሚ መዓልቲ፡ 30 ግንቦት 2018 ኣብ ኣስመራ ኪፍጸም ኢዩ። ዘመነ ግርንቢጥ ኰይኑ፡ ከም በዓል ጸሃይቱ ዚኣመሰሉ፣ ንናጽነት፡ ንባህልን ንሰውራን ደርማስ ኣበርክቶ ዚገበሩ ዓበይቲ ጀጋኑ ኣብ ስደት ኪበልዩ ንዅሉ ደላይ ፍትሒ ኤርትራዊ ድርብ ሓዘን ኢዩ። በዚ ሕማቕ ኣጋጣሚ እዚ፡ ኤሪ-ፕላትፎርም ዓሚቝ ሓዘንና እናገለጽና ንመላእ ቤተሰብን ፈተውትን ጸሃይቱ ጽንዓት ይሃብኩም፣ ንዓኣ ድማ መንግስተ ሰማይ የዋርስኪ ንብል።