www.eri-platform.org


03.11.2017


ሰላማዊ ሰልፊ ኣብ ኣስመራ


ትማሊ ሰሉስ 31 ጥቅምቲ 2017፡ ኣብ ኣስመራ ሰላማዊ ሰልፊ ከም ዚተኻየደ፡ ብማሕበራዊ ማዕከናት ዜና ብሰፊሑ ኪቃላሕ ቀንዩ። 


እቲ መበገሲ ጠንቂ ናይቲ ሰላማዊ ሰልፊ፣ እቲ ቅድሚ ክልተ ቅነ ኣቢሉ፡ በቲ ስርዓት ዚተፈጸመ ምዕጻው ናይታ ኣብ ኣኽርያ እትርከብ ቤት ትምህርቲ ኣልድያእ ኣል እስላምያ ኢዩ። እቶም በቲ ምዕጻው ዚተቘጥዑ ወለድን ኣባላት ቦርድ ቤት ትምህርትን፡ ኣብ ቀጽሪ ናይታ ቤት ትምህርቲ ተኣኪቦም፡ ተቓውሞኦም ብትሪ ብምግላጽ፣ እታ ቤት ትምህርቲ ንኺትክፈትን ኣገልግሎታ ኪትቅጽልን ጠሊቦም። ይዅን’ምበር፡ እቲ መሰረታዊ መሰላት ዜጋታት ዘየኽብርን ዚዀነ ዓይነት ተቓውሞ ዘየፍቅድን ውልቀ-ምልካዊ ስርዓት፡ ሓይልታት ጸጥታ ልኢኹ፡ ንኣቦይ ሓጂ ሙሳ መሓመድኑር፡ ኣቦ መንበር ቦርድ ቤት ትምህርቲ ኣልድያእ ኣል እስላምያ፡ ከምኡ’ውን ቍጽሮም ብልክዕ ዘይተፈልጠ ካልኦት ሰባትን ኣብ ቀይዲ ከም ዘእተወ ተሓቢሩ።   


ኣብ ክሊ’ዚ ኵነት’ዚ፡ ተማሃሮ ናይታ ቤት ትምህርቲ፡ ንምዕጻው ናይታ ቤት ትምህርቲ ብምቅዋም፣ እታ ቤት ትምህርቶም ንኺትክፈትን፡ኣቦ መንበር ቦርድን እቶም ካልኦት እሱራትን ንኪፍትሑ ዚጠልብ ሰላማዊ ሰልፊ ብሰሉስ 31 ጥቅምቲ ኣካይዶም። እቲ ሰላማዊ ሰልፊ ብሓይሊ ፖሊስን ዕጡቓት ወተሃደራትን፡ ናይ ምፍርራሕ ተዅሲ ንሰማይ ብዚተሓወሶ ብበትሪ ምህራምን ምጕያይን፡ ተበታቲኑ። ኣብቲ ክስተት፡ ሓድሓደ ብበትሪ ተቐጥቒጦም ብኸቢድ ዚቘሰሉ ሰባት’ኳ እንተለዉ፣ ዚተቐትለ ወይ ዚጠፍአ ሂወት ሰብ ከምዘየለ፣ ተሓቢሩ። ብድሕሪኡ፡ ኣብ ምሉእ ኣስመራ፡ ብፍላይ ኣብ ከባቢ ኣኽርያ፡ መንቀሳቐሲ ወረቐት ምሕታትን ሰብ ምግፋፍን ከም ዚሰዓበ ተገሊጹ። 


እቲ መንግስቲ እቲ ዚነበረ ኵነታት ኣቓልቦ ከም ዘይረክብ ንምግባር፡ ንጽባሒቱ ኣስመራ ብዅሉ ከባቢታት ተረጋጊኣ ከም እትዉዕልን እቶም ወተሃደራት ነናብ ቦታኦም ከምዚምለሱን’ኳ እንተገበረ፣ እቲ ዘጋጠመ ዕግርግር ኣብ ዓይንን እዝንን ኵሉ ህዝቢ ስለ ዝበጽሐ፣ መንግስቲ ንህዝቢ ንምርዓድን እቲ ዘጋጠመ ኵነታት ተዀኒኑ ከም ዚተርፍ ንምግባርን፣ ብ03 ነቲ ተግባር ዚዅንን ወረታት ብብዝሒ ኣብ ምንዛሕ ከም ዚርከብ ምንጭታት ይገልጹ። ይዅን’ምበር፡ እዚ ተባዕ ተቓውሞ’ዚ ብመላእ ህዝቢ ኤርትራ ኪንኣድ፡ ኪተባባዕን ኪድገፍን እምበር ኪዅነን ዚግብኦ ኣይኰነን። 


ወዮ ድኣ ኤርትራ ኣብ ትሕቲ ሓደ ሕገ-ኣልቦ ስርዓት እትመሓደር ሃገር ኰይና’ምበር፣ መንግስቲ ፖለቲካን ሃይማኖትን ኪሓዋውስ፣ ኣብ ሃይማኖታዊ ጕዳያት ጣልቃ ኪኣቱ፣ ፍጹም ኣይግባእን። ንሓንቲ ንነዊሕ ዓመታት ኣገልግሎት ኪትህብ ዚጸንሐት ብሕታዊት ቤት ትምህርቲ ብሓይሊ ኪዓጹ’ውን ኣይግባእን። ከም ሓፈሻዊ መትከል ግን፡ ሓደ ንሃገርን ህዝብን ዚሓሊ ይዅን ብግቡእ ዚሰርሕ መንግስቲ ምስ ዚህሉ፣ ዜግነታዊ መሰል ተማሃሮ ንምዕሩይ ትምህርቲ ንምርግጋጽ፣ ስርዓተ-ትምህርቲ ከመዓራሪ፡ ትሕዝቶ ካሪክሉም ኪሰርዕ፣ ዓቢ ሓላፍነት ከም ዘለዎ ኪስሓት የብሉን። በቲ ካልእ ወገን ድማ፡ ከምዚ ዚኣመሰለ ክስተታት ኣብ ዘጋጥመሉ እዋናት፣ ነቲ ዚዓበየ ዕላማ ሃገራዊ ቃልሲ ንደሞክራስያዊ ለውጢ ከተዓንቕፍ ዚኽእል ዘየድሊ ረጽሚ ካብ ምስዋር ይዅን ዘይኰነ ሓበሬታ ካብ ምዝራእ ምጥንቃቐ ኣዝዩ ኣገዳሲ ቁምነገር እመስለና። 


—————


www.eri-platform.org